Il-Ġimgħa l-1 ta’ Awwissu ġiet inawgurata wirja ta’ arti fuq manikini bit-titlu Colours in Europe with Maltese Reflections, l-ewwel wirja ta’ din ix-xorta fid-dinja. Is-serata inawgurali nfetħet mill-preżentattriċi Josephine Ebejer Grech, li tat diskors ta’ merħba u introduzzjoni dwar Catwalk Productions International, organizzazzjoni stabbilita li ilha għal dawn l-aħħar 38 sena torganizza avvenimenti kulturali u artistiċi f’pajjiżna.
Dan l-avveniment speċjali laqa’ lill-udjenza u tkellem b’emozzjoni dwar il-ħolma ta’ Paul Chetcuti li ssir realtà: wirja unika ta’ 42 manikin impittra bl-idejn minn 37 artist Malti, fosthom ismijiet stabbiliti u oħrajn emerġenti fix-xena artistika lokali.
Dan l-avveniment prestiġjuż laħaq mument importanti meta Malta Records ippreżentaw ċertifikat uffiċjali ta’ unur lil Chetcuti, billi ġew rikonoxxuti għall-ewwel darba f’Malta, 42 manikini ġew impittra minn għadd daqstant kbir ta’ artisti f’esebizzjoni waħda. Dan mhux biss kisba artistika imma wkoll rekord nazzjonali li jġib miegħu unur kbir għall-arti viżiva Maltija.
Bħala tifkira speċjali tal-okkażjoni, tqassam ukoll ktieb li jinkludi informazzjoni dettaljata dwar kull artist parteċipanti, flimkien ma’ bijografija qasira u ritratt professjonali tal-manikin tiegħu jew tagħha. Dan il-ktieb jirrappreżenta dokumentazzjoni importanti ta’ dan il-proġett kollettiv u jgħin biex jiġi ppreservat dan il-mument uniku fil-kalendarju kulturali Malti.
Matul is-serata tkellem ukoll l-artist stabbilit Joseph Barbara, li kien mistieden speċjali u li indirizza lill-pubbliku b’diskors ispiranti dwar l-irwol tal-arti fil-komunità, l-importanza tal-kollaborazzjoni bejn l-artisti u l-ħtieġa li jiġu promossi talenti lokali f’fora pubbliċi. L-esebizzjoni ngħatat bidu b’mod simboliku permezz ta’ żvelar uffiċjali tal-manikini, li kienu mħejjija b’kura u dedikazzjoni artistika mill-għażla tal-kuluri sal-aħħar dettall.
Ritratti: Paul Chetcuti
