Il-Kunsill Malti għall-Arti se jorganizza konferenza nazzjonali dwar il-futur tal-edukazzjoni artistika f’Malta, bit-tema “Insawru l-Futur”. Din il-konferenza, li se ssir fil-30 t’Ottubru fil-kampus tal-MCAST f’Raħal Ġdid, se toffri spazju għal djalogu nazzjonali, riflessjoni u diskussjoni dwar kif l-edukazzjoni tal-arti tista’ tkompli tiżviluppa f’pajjiżna.
L-avveniment jiftaħ kapitlu ġdid fil-proċess lejn il-ħolqien ta’ Akkademja Nazzjonali għall-Arti Performattiva u Viżwali – proġett li jmur lura għall-manifest elettorali tal-2022 u li issa qed jieħu forma permezz tal-Istrateġija Nazzjonali tal-Edukazzjoni 2024–2030. Fl-2024, il-Kunsill u l-Ministeru għall-Edukazzjoni kkummissjonaw rapport ta’ riċerka mill-ARC Research and Consultancy biex janalizza l-bżonnijiet u l-potenzjal ta’ dan is-settur.
Ir-riżultati wrew kemm il-qasam tal-arti f’Malta għandu potenzjal qawwi, iżda fl-istess ħin jiffaċċja sfidi serji bħan-nuqqas ta’ fondi u infrastruttura adegwata. Minflok li tinħoloq istituzzjoni ġdida, ir-riċerka tissuġġerixxi l-iżvilupp ta’ “ekoloġija akkademika” – mudell kollaborattiv li jgħaqqad l-istituzzjonijiet eżistenti taħt viżjoni komuni, filwaqt li jħalli lil kull waħda żżomm l-awtonomija tagħha.
Il-konferenza se tiġbor flimkien professjonisti lokali u internazzjonali – edukaturi, artisti, studenti u dawk li jfasslu l-politika – biex jiddiskutu ideat ġodda u jaqsmu esperjenzi ta’ suċċess.
Fost il-punti ewlenin tal-programm:
-
Diskors ewlieni dwar ir-rwol ta’ akkademja tal-arti fis-seklu 21, b’enfasi fuq l-interdixxiplinarjetà, is-sostenibbiltà u l-kura.
-
Diskussjoni fuq panel ma’ esperti internazzjonali dwar il-politika, il-mudelli istituzzjonali u strateġiji għal sistema edukattiva tal-arti inklużiva u reżiljenti.
-
Preżentazzjoni ta’ dokumenti ta’ pożizzjoni minn istituzzjonijiet ewlenin Maltin li jindirizzaw l-isfidi u l-prijoritajiet għal futur komuni fl-edukazzjoni artistika.
L-għan ewlieni hu li jinħoloq pjan direzzjonali li jsaħħaħ l-edukazzjoni tal-arti f’Malta b’mod sostenibbli, inklużiv u konformi mal-ambizzjonijiet kulturali u edukattivi kemm fuq livell nazzjonali kif ukoll internazzjonali.
Il-konferenza hija miftuħa għall-pubbliku, iżda l-postijiet huma limitati u se jiġu allokati fuq bażi ta’ min jasal l-ewwel. Il-programm sħiħ u l-formola ta’ reġistrazzjoni jinsabu fuq www.artscouncilmalta.gov.mt.
