L-Arċidjoċesi ta’ Malta daħlet fi ftehim ma’ CPHCL, l-azzjonist maġġuri tal-Corinthia Group, biex Casa Leone XIII f’San Ġiljan tinbidel f’dar tal-anzjani moderna u ta’ livell għoli. Din ir-residenza, li tinsab fuq sit ta’ 8,000m² u tilqa’ 98 resident, se tgħaddi minn proċess ta’ modernizzazzjoni b’fażijiet mingħajr ma jfixkel il-ħajja ta’ dawk li jgħixu fiha.
Skont il-ftehim, CPHCL se jinvesti fil-bini, tmexxi l-iżvilupp u topera r-residenza għall-50 sena li ġejjin. L-esperjenza tal-kumpanija fl-ospitalità, il-manutenzjoni u s-servizzi ta’ kuljum se tintuża biex Casa Leone ssir waħda mid-djar tal-anzjani ewlenin f’Malta. Il-proġett jinkludi titjib ġewwa u barra, kif ukoll żieda fin-numru tas-sodod.
L-Arċidjoċesi assigurat li l-valuri u l-ethos tal-Knisja jibqgħu rispettati, filwaqt li r-residenti jibbenefikaw minn servizz ta’ kwalità u ambjent aħjar. Il-GWU, li tirrappreżenta l-impjegati, ġiet informata bil-proċess u qed taħdem biex tiġi aġġornata l-ftehima kollettiva.
Casa Leone tibqa’ proprjetà tal-Knisja, li se tkompli tagħti prijorità għat-taħriġ tal-istaff u għall-kura professjonali lir-residenti. Din is-sħubija tħares biex tiżgura futur sostenibbli, b’dinjità u b’eċċellenza għal snin twal li ġejjin.
Dwar Casa Leone XIII:
Oriġinarjament kienet dar immexxija mill-Blue Sisters mill-1900, li matul is-snin serviet bħala sptar u aktar tard bħala dar tal-anzjani. Reġgħet fetħet fl-1985 taħt l-Arċidjoċesi, li minn dakinhar kienet responsabbli mit-tmexxija tagħha.
Dwar CPHCL:
CPHCL hija l-akbar azzjonist tal-Corinthia Group u involuta f’ħafna setturi relatati mal-propjetà, ospitalità, servizzi ta’ manutenzjoni u negozji oħra f’Malta u barra.
