Il-wirja se tkun esebita fil-Victor Pasmore Gallery sal-3 ta’ Jannar
Taħt il-patroċinju tal-Ministeru għall-Kultura, l-Artijiet u l-Gvern Lokali, il-Kunsill Malti għall-Arti nieda l-kapitlu l-ġdid tas-sensiela Retold, li tfakkar l-għaxar anniversarju tal-Kunsill. Wara suċċess tas-serje aktar kmieni din is-sena, issa qed tkun ippreżentata f’Malta adattazzjoni ta’ wieħed mill-aktar proġetti rikonoxxuti tal-Venice Biennale: Burning Waters – Diplomazija Astuta tal-artist Arcangelo Sassolino.
L-installazzjoni, li nħolqot għall-Malta Pavilion tal-59 edizzjoni tal-La Biennale di Venezia u li kienet ikkurata minn Keith Sciberras u Jeffrey Uslip, issa qed tintwera fil-Victor Pasmore Gallery fil-Belt Valletta. Retold jsaħħaħ l-impenn tal-Kunsill Malti għall-Arti li jressaq lejn il-pubbliku Malti proġetti li kisbu rikonoxximent internazzjonali, u li jibqa’ jinbena d-djalogu kulturali nazzjonali.
Dr Luke Dalli, iċ-Chairman Eżekuttiv tal-Kunsill Malti għall-Arti, qal li l-wirja turi kif biċċa xogħol esebita fuq pjattaforma internazzjonali tista’ tkompli tevolvi meta tiġi integrata fil-kuntest lokali. Sostna li l-bidla mill-kuntatt bejn l-azzar imdewweb u l-ilma għal dak bejn l-azzar u l-karta toħloq fraġilità ġdida li tagħti dimensjoni oħra lill-opra. Enfasizza wkoll li l-ispazju għal reinterpretazzjoni huwa ċentrali għal politika kulturali b’saħħitha, li ssir possibbli permezz ta’ kollaborazzjoni bejn artisti, kuraturi u istituzzjonijiet.
Ix-xogħol ta’ Sassolino huwa magħruf internazzjonalment għall-mod kif jisfida l-limiti materjali tal-metall. L-installazzjoni oriġinali fl-Arsenale ta’ Venezja kienet tpoġġi lill-udjenza quddiem spettaklu qawwi ta’ azzar imdewweb u ilma f’laqgħa drammatika li tieħu ispirazzjoni mid-demm fir-Qtugħ ta’ Ras San Ġwann Battista ta’ Caravaggio.
Għall-preżentazzjoni f’Malta, kurata minn Keith Sciberras, Sassolino qed juri xogħlijiet fuq karta ffurmati direttament mill-proċess tal-azzar imdewweb. Il-karta turi marki u perforazzjonijiet li jirreġistraw il-kolliżjoni bejn is-sħana, il-gravità u l-materjal, u joħolqu mudelli organiċi u imprevedibbli.
Qabel din il-wirja, Retold laqqgħet lill-pubbliku Malti ma’ diversi proġetti li kkruċjaw il-fruntieri kulturali, fosthom Urban Fabric fil-Foss tal-Imdina, Revisiting Maleth fil-Mużew Nazzjonali tal-Istorja Naturali, The Ship (Unseen) fil-Palazz tal-Inkwiżitur, u Homo Melitensis f’MUŻA.
Burning Waters – Diplomazija Astuta se tkun miftuħa għall-pubbliku sal-bidu ta’ Jannar 2026.
Għal aktar dettalji żur il-website tal-Kunsill Malti għall-Arti: https://artscouncilmalta.gov.mt.
