Avveniment biennali li jiċċelebra l-eċċellenza artistika, l-innovazzjoni u l-impatt fuq il-komunità.
Kollox jinsab lest għall-edizzjoni ta’ din is-sena tal-Premju għall-Arti, organizzat mill-Kunsill Malti għall-Arti, hekk kif is-setturi kulturali u kreattivi f’Malta qegħdin iħejju ruħhom biex ifakkru u jonoraw artisti, prattikanti u proġetti li spikkaw u għollew il-livell tal-ekosistema artistika lokali.
L-avveniment se jsir illum il-Ġimgħa fit-Teatru Manoel, u ser jirrikonoxxi l-eċċellenza artistika permezz ta’ 14-il kategorija kompetittiva u seba’ unuri onorarji. Dan kollu bl-għan li jiġu enfasizzati l-prattiki u l-inizjattivi li ffurmaw u biddlu x-xena kulturali Maltija matul dawn l-aħħar sentejn.
Iċ-Chairman Eżekuttiv tal-Kunsill Malti għall-Arti, Dr Luke Dalli, qal:
“L-istrateġija tagħna hija vjaġġ kontinwu lejn l-eċċellenza, kif jixraq lill-industriji kulturali u kreattivi tagħna. Il-Premju għall-Arti huwa pass importanti f’dan il-mixja, għaliex jitfa’ dawl fuq kull artist u prattikant li qed jagħmel dan il-vjaġġ magħna. Din is-sena rċevejna rekord ta’ nomini, rifless tal-livell għoli tas-settur. Inħossni kburi bil-finalisti – huma ambaxxaturi denji tas-settur, u bla dubju se jispiraw lil ħaddieħor biex jilħaq traguardi ogħla.”
It-tħejjijiet li għaddejjin bħalissa, minn xogħol fuq il-palk sal-provi tekniċi, juru l-valur ta’ dan l-avveniment li sar referenza ewlenija fil-qasam kulturali. Il-ġurnata tal-lum se tanalizza wkoll il-prijoritajiet ċentrali tal-istrateġija fit-tul tal-Kunsill Malti għall-Arti, fosthom il-professjonaliżmu, l-inklużjoni u l-iżvilupp sostenibbli tal-arti – kollha allinjati ma’ Viżjoni Malta 2050, il-qafas nazzjonali. L-avveniment iservi wkoll bħala kulminazzjoni għall-ewwel għaxar snin tal-Kunsill.
In-nominazzjonijiet kollha għaddew minn proċess ta’ evalwazzjoni rigoruż, immexxi minn ġurija magħmula minn esperti esterni flimkien ma’ rappreżentanti tal-Kunsill. Il-finalisti magħżula juru standard artistiku għoli ħafna, b’ħames nomini biss għal kull kategorija jgħaddu għall-fażi finali.
Il-Premju għall-Arti se jixxandar live fuq il-paġna tal-Facebook tal-Kunsill Malti għall-Arti nhar il-5 ta’ Diċembru fis-18:15.
