Is-seba’ edizzjoni tal-Premju għall-Arti – li qed issir fl-għaxar anniversarju tal-Kunsill Malti għall-Arti – laħqet rekord ġdid ta’ 600 nomina.
Il-Kunsill Malti għall-Arti (KMA), taħt il-patroċinju tal-Ministeru għall-Kultura, l-Artijiet u l-Gvern Lokali, ħabbar ir-rebbieħa tal-Premju għall-Arti 2025. Din l-edizzjoni timmarka wkoll mument importanti, hekk kif inġabru l-akbar numru ta’ nominazzjonijiet minn meta twaqqaf dan il-Premju.
Ir-rebbieħa ġew imħabbra f’14-il kategorija kompetittiva, filwaqt li ngħataw ukoll seba’ titli lil individwi u organizzazzjonijiet li tul is-snin taw kontribut qawwi u li ħallew impatt fuq id-dehra kulturali ta’ Malta. Il-vot tal-pubbliku ntuża f’erba’ kategoriji u ġibed lejh 2,100 vot – indikazzjoni ċara ta’ kif l-udjenzi qed jinvolvu ruħhom dejjem aktar f’dan il-proċess.
Il-Ministru għall-Kultura, l-Artijiet u l-Gvern Lokali Owen Bonnici faħħar id-diversità u n-numru tan-nominazzjonijiet, u sostna li din hija l-akbar edizzjoni tal-Premju għall-Arti sal-lum. Huwa żied jgħid li dan jirrifletti ekosistema artistika li qed tikber, issir aktar inklużiva u tkompli tħeġġeġ talenti u ideat ġodda. Ir-rispons li deher din is-sena juri kemm l-arti għandhom post sod fil-komunitajiet tagħna, u jsegwi l-impenn li hemm fil-programm elettorali biex jiġi msaħħa l-aċċess u jinħolqu aktar opportunitajiet madwar il-pajjiż.
Il-Ministru Bonnici tenna wkoll li x-xogħol se jibqa’ mmexxi mill-għanijiet fit-tul deskritti f’Viżjoni Malta 2050, biex jitissaħħu strutturi li jappoġġjaw lill-artisti, lill-organizzazzjonijiet kulturali u lill-prattikanti kreattivi fuq kull livell.
Dr Luke Dalli, iċ-Ċermen Eżekuttiv tal-KMA, enfasizza l-irwol tal-Premju fit-tisħiħ tal-professjonalità fis-settur kreattiv. Huwa spjega li l-Premju għall-Arti jkompli jispira lill-artisti u lill-organizzazzjonijiet biex jaħdmu lejn l-eċċellenza. Ir-rispons qawwi ta’ din is-sena juri settur li qed jimmatura, jinvesti aktar fis-sengħa tiegħu u jadotta approċċ aktar professjonali għall-ħolqien u l-kollaborazzjoni. Hekk kif il-KMA jiċċelebra l-ewwel għaxar snin tiegħu, l-impenn jibqa’ li jitħaddem dan il-momentum u tinżamm il-kwalità bħala l-mexxejja tas-settur.
Il-KMA jawgura mill-ġdid lin-nominati kollha u lir-rebbieħa ta’ din l-edizzjoni bla preċedent. Il-lista sħiħa tar-rebbieħa tinsab annessa. Aktar dettalji jinsabu fuq il-website tal-KMA.
Ritratti: MCLG
