Diversi Kunsilli Lokali se jingħataw fondi addizzjonali mid-Diviżjoni għall-Gvern Lokali biex ikunu jistgħu jżommu u jsostnu proġetti infrastrutturali maġġuri li kienu saru mill-Gvern Ċentrali fil-lokalità tagħhom.
Dan tħabbar mis-Segretarju Parlamentari għall-Gvern Lokali, Alison Zerafa Civelli, flimkien mad-Direttur Ġenerali Emile Vassallo, li spjegaw kif din l-iskema hi parti minn diversi inizjattivi oħra li jagħtu appoġġ finanzjarju lill-Kunsilli. L-għan hu li l-Kunsilli jkollhom biżżejjed riżorsi biex jagħmlu l-manutenzjoni meħtieġa għall-ġid tal-komunità.
Is-Segretarju Parlamentari spjegat li l-iskema nħolqot għax f’ħafna każi proġetti li saru matul is-snin kienu qed jitħallew għaddejjin għall-għarrieda minħabba nuqqas ta’ fondi mill-Kunsilli. Permezz ta’ din l-inizjattiva, l-Gvern qed jassigura li l-investiment li jkun sar ma jintilifx u li dawn il-proġetti jibqgħu f’kundizzjoni tajba, f’konformità mal-Viżjoni Malta 2050.
Hija saħqet ukoll li l-manutenzjoni ta’ spazji pubbliċi—bħal ġonna, ċentri rikreattivi, żoni tat-tfal u oħrajn—hija kruċjali kemm għat-tisbiħ tal-lokalitajiet kif ukoll għas-sigurtà tar-residenti.
Min-naħa tiegħu, Emile Vassallo qal li din l-iskema, li tinsab fis-seba’ sena tagħha, se terġa’ tgħin bosta Kunsilli Lokali. Żied li dan huwa pass importanti biex l-iżvilupp ta’ spazji miftuħa jibqa’ jitgawda fit-tul. Huwa spjega li l-iskema hija mmirata lejn Kunsilli li rċevew proġett maġġuri mill-Gvern u li issa għandhom bżonn fondi biex iżommuh f’aħjar kundizzjoni. L-investiment totali se jlaħħaq madwar kwart ta’ miljun ewro.
Fost il-proġetti hemm manutenzjoni ta’ culverts, tħawwil ta’ siġar, installazzjoni ta’ bankijiet, żoni għall-attività fiżika, bandli għat-tfal, u dawl fit-toroq. Il-lokalitajiet li se jibbenefikaw huma: il-Mosta, Birkirkara, Ħal Għargħur, Ħal Lija, il-Gudja, Marsaxlokk, Paola, l-Imqabba, in-Nadur, ix-Xagħra u ż-Żebbuġ (Għawdex).
