L-Assoċjazzjoni Wirt il-Kalkara qed terġa’ ttenni l-appell urġenti tagħha sabiex jittieħdu passi konkreti u immedjati biex jiġi mħares u salvat il-Forti Salvatur fil-Kalkara — binja ta’ importanza storika u kulturali kbira li bħalissa tinsab f’qagħda allarmanti ta’ deterjorazzjoni kontinwa.
Intqal li għalkemm jirrikonoxxu li l-forti jinsab f’idejn sidien privati, l-istat attwali tiegħu jesiġi intervent koordinat u deċiżiv mill-Gvern, flimkien mal-partijiet kollha kkonċernati, qabel ma dan il-monument jitħalla jintilef b’mod irriversibbli.
Il-Forti Salvatur ilu jifforma parti mill-wirt storiku Malti għal sekli sħaħ. Madankollu, b’kuntrast ma’ fortifikazzjonijiet oħra li spiss jirċievu attenzjoni akbar minħabba l-lokalità jew il-profil turistiku tagħhom, dan il-forti jinsab kważi minsijja. Dan is-skiet mhuwiex ġustifikat: il-Forti Salvatur jistħoqqlu l-istess livell ta’ viżibbiltà, kura u impenn sabiex jiġi protett u mħares għall-ġenerazzjonijiet futuri.
Appell ċar għall-azzjoni
Sabiex il-Forti Salvatur jiġi mħares u rkuprat, l-Assoċjazzjoni Wirt il-Kalkara tħeġġeġ lill-awtoritajiet sabiex jikkunsidraw bis-serjetà li jerġgħu jieħdu lura dan il-monument, jew permezz ta’ xiri dirett, jew billi jingħata kumpens ġust lis-sidien attwali permezz ta’ sit alternattiv ta’ valur komparabbli. Dan il-pass huwa kruċjali biex tinfetaħ it-triq għal restawr professjonali u għal użu mill-ġdid sostenibbli fl-interess nazzjonali.
Barra minn hekk, hemm bżonn urġenti ta’ xogħlijiet ta’ stabilizzazzjoni immedjata, flimkien ma’ valutazzjoni teknika u komprensiva tal-kundizzjoni tal-forti. Din għandha twassal għal pjan ta’ restawr maqsum f’fażijiet, imfassal skont il-prinċipji u l-aħjar prattiki tal-konservazzjoni tal-wirt mibni. Għal dan il-għan, nappellaw għat-twaqqif ta’ task force dedikat li jkun responsabbli mill-koordinazzjoni tax-xogħlijiet, il-permessi meħtieġa, kif ukoll l-identifikazzjoni ta’ fondi u opportunitajiet ta’ finanzjament.
Viżjoni għal futur sostenibbli
Il-futur tal-Forti Salvatur għandu jkun wieħed li jħaddan użu sostenibbli u ffukat fuq il-komunità. Il-forti jista’ jinbidel f’esperjenza unika tal-wirt storiku tal-inħawi, inkluż l-iżvilupp ta’ lukanda b’tema storika, imsaħħa bi spazji edukattivi u kulturali. Dan mhux biss jikkontribwixxi għall-ħarsien tal-wirt, iżda wkoll isaħħaħ it-turiżmu kulturali u joħloq impjiegi ta’ kwalità fil-lokalità.
L-Assoċjazzjoni Wirt il-Kalkara tibqa’ lesta biex tikkollabora bis-sħiħ mal-Gvern u mal-awtoritajiet kompetenti, billi tipprovdi informazzjoni, dokumentazzjoni u għarfien meħtieġ. Flimkien nistgħu naslu għal soluzzjoni vijabbli li tqiegħed il-wirt storiku u l-komunità lokali fiċ-ċentru tad-deċiżjonijiet.
