Heritage Malta ħabbret il-Kalendarju tal-Attivitajiet tagħha għall-2026, programm estensiv b’aktar minn 200 attività li matul is-sena kollha se jqarrbu lill-pubbliku lejn il-patrimonju Malti b’mod esperjenzjali, parteċipattiv u miftuħ għal kulħadd.
Il-Ministru għall-Kultura, l-Artijiet u l-Gvern Lokali Owen Bonnici qal li dan il-kalendarju juri kif il-wirt kulturali mhux biss jiġi mħares, iżda wkoll jitwassal b’mod ħaj lin-nies. Huwa sostna li programm mifrux fuq sena jfisser aktar aċċessibilità, aktar involviment u aktar opportunitajiet biex il-pubbliku jgawdi l-wirt Malti.
Iċ-Chairman ta’ Heritage Malta u President tal-Malta Biennale 2026, Mario Cutajar, spjega li l-kalendarju jqiegħed lin-nies fiċ-ċentru tal-esperjenza. Skontu, dan huwa mod kif Heritage Malta tqarreb lill-komunità lejn il-patrimonju komuni tagħna, filwaqt li tgħin biex nifhmu aħjar ir-relazzjoni bejn l-imgħoddi u l-preżent. Huwa rrimarka wkoll li l-Malta Biennale jibqa’ element ewlieni f’din il-viżjoni ta’ aċċessibbiltà kulturali.
Min-naħa tiegħu, il-Kap Eżekuttiv ta’ Heritage Malta Noel Zammit qal li billi l-aġenzija tkompli tiftaħ aktar siti u toħloq esperjenzi memorabbli, il-patrimonju ta’ Malta jibqa’ relevanti għal udjenzi ta’ kull età. Huwa saħaq li Heritage Malta qed issaħħaħ id-djalogu bejn iż-żminijiet, biex il-wirt kulturali ma jitqiesx biss bħala relikwa tal-passat, imma bħala legat ħaj li jappartjeni lil kulħadd.
Il-familji u t-tfal għandhom post ċentrali f’dan il-programm, b’attivitajiet interattivi, tours edukattivi u workshops li jrawwmu l-kurżità u s-sens ta’ appartenenza sa minn età żgħira. Fl-istess ħin, il-kalendarju jinkludi inizjattivi marbuta mal-benesseri, bħal sessjonijiet ta’ eżerċizzju u nifs, kif ukoll attivitajiet kreattivi bħas-Sip & Paint f’siti storiċi.
L-ikel u t-tradizzjonijiet kulinari jibqgħu parti importanti mill-programm, b’esperjenzi Taste History u cookalongs li jgħaqqdu stejjer antiki ma’ togħmiet Maltin. Barra minn hekk, mixjiet iggwidati, tours tematiċi u dawriet bil-baħar jiftħu perspettivi ġodda fuq siti magħrufa. Sessjonijiet speċjali għal persuni b’diżabilità jkomplu jsaħħu l-inklużjoni, filwaqt li l-membri ta’ Heritage Malta jingħataw esperjenzi esklussivi. Se jerġa’ jirritorna wkoll il-kunċett ta’ Museums by Candlelight, li joffri esperjenza differenti u atmosfera unika fis-siti storiċi.
Fost l-aktar avvenimenti mistennija tal-2026 hemm it-tieni edizzjoni tal-Malta Biennale, li se terġa’ tittrasforma siti storiċi fi spazji għall-arti kontemporanja lokali u internazzjonali, u tħeġġeġ djalogu bejn il-passat u l-preżent.
Il-kalendarju tal-attivitajiet ta’ Heritage Malta għall-2026 u aktar informazzjoni dwar il-biljetti jistgħu jinstabu fuq is-sit uffiċjali ta’ Heritage Malta, kif ukoll permezz tal-kanali diġitali tal-aġenzija.
