Il-Ministru għal Għawdex u l-Ippjanar Clint Camilleri nieda uffiċjalment l-edizzjoni ta’ din is-sena tal-Karnival Reġjonali ta’ Għawdex, avveniment li kull sena jkun fost l-aktar mistennija fil-kalendarju kulturali tal-gżira u li juri l-ispirtu vibranti tal-komunità Għawdxija.
Il-programm jiftaħ bil-Parata tal-Karnival nhar is-Sibt 7 ta’ Frar fis-7.30pm, u jkompli b’numru ta’ attivitajiet fil-Belt Victoria u f’diversi lokalitajiet madwar Għawdex sas-17 ta’ Frar 2026.
Il-Ministru Camilleri sostna li l-Karnival ta’ Għawdex jirrifletti l-identità kulturali u l-kreattività tal-poplu Għawdxi. Qal li dan l-avveniment mhux biss isaħħaħ it-tradizzjonijiet, iżda jkompli jattira viżitaturi u joħloq benefiċċji ekonomiċi u soċjali għall-gżira. Huwa żied li l-Ministeru jibqa’ impenjat li jappoġġja lil dawk kollha li, bid-dedikazzjoni tagħhom, jagħmlu dan l-avveniment possibbli, filwaqt li jiżguraw ambjent sigur u organizzat kemm għar-residenti kif ukoll għall-viżitaturi.
Matul dawn il-jiem, Għawdex jinbidel f’ċelebrazzjoni ta’ arti, kulur u tradizzjoni. L-attivitajiet, li prinċipalment ikunu ċċentrati fil-Belt Victoria, juru t-talenti tad-dilettanti tal-Karnival permezz tal-karrijiet, il-kostumi u l-prestazzjonijiet artistiċi tagħhom. Il-Karnival jgħaqqad wirt antik ma’ espressjoni kontemporanja, u joffri spettaklu adattat għall-familji u għal kull min iżur il-gżira f’dan il-perjodu.
Parti importanti minn din iċ-ċelebrazzjoni huwa wkoll il-Karnival spontanju tan-Nadur, magħruf għall-istil partikolari u awtentiku tiegħu. Dan l-avveniment sar attrazzjoni ewlenija li joffri esperjenza differenti u jkompli jsaħħaħ il-profil tal-Karnival Għawdxi.
Il-Karnival ta’ Għawdex jattira viżitaturi mhux biss minn Malta iżda wkoll minn barra, u joħloq laqgħa ta’ nies madwar wirt, kreattività u divertiment.
Fi tmiem nett, il-Ministru Clint Camilleri stieden lil kulħadd biex jieħu sehem f’din iċ-ċelebrazzjoni fejn il-ferħ, il-kreattività u l-ispirtu komunitarju jkunu fiċ-ċentru tal-esperjenza.
Għal aktar informazzjoni u l-programm sħiħ wieħed jista’ jżur eventsingozo.com jew juża l-app Events in Gozo.
Ritratti: MGP
