Tnediet inizjattiva ġdida li se tintroduċi videos edukattivi dwar il-vjolenza domestika waqt il-lezzjonijiet tal-PSCD fl-iskejjel, bil-għan li tissaħħaħ il-prevenzjoni u jiżdied l-għarfien fost l-istudenti minn età żgħira.
Din l-inizjattiva qed titmexxa mis-Segretarjat Parlamentari għar-Riformi u l-Ugwaljanza flimkien mal-Kummissjoni dwar il-Vjolenza Abbażi tal-Ġeneru u l-Vjolenza Domestika, u tinkludi sitt filmati qosra li jippreżentaw sitwazzjonijiet realistiċi ta’ abbuż u mġiba li tista’ twassal għal forom differenti ta’ vjolenza. Uħud minn dawn ix-xeni ġew adattati minn produzzjonijiet teatrali li kienu parti mill-kampanja “Nieqfu Flimkien. Flimkien Infiqu” organizzata matul is-16-il Jum ta’ Attiviżmu kontra l-Vjolenza Abbażi tal-Ġeneru.
Il-filmati huma maħsuba biex iservu ta’ għodda viżiva u edukattiva li fuqhom jinbnew diskussjonijiet fil-klassi, sabiex l-istudenti jitgħallmu jagħrfu sinjali ta’ abbuż u kif jevitaw sitwazzjonijiet li jistgħu jwasslu għal vjolenza domestika jew vjolenza abbażi tal-ġeneru. Barra minn hekk, dawn il-videos se jintużaw ukoll bħala materjal ta’ taħriġ għal professjonisti li fil-ħidma tagħhom jiltaqgħu ma’ każijiet relatati ma’ dan il-qasam.
L-inizjattiva ġiet imnedija fl-iskola St Francis f’Birkirkara u tifforma parti mill-implimentazzjoni tal-Istrateġija Nazzjonali dwar il-Vjolenza Abbażi tal-Ġeneru u l-Vjolenza Domestika. Din l-istrateġija tpoġġi enfasi qawwija fuq l-edukazzjoni u l-għarfien, partikolarment dwar x’jikkostitwixxi vjolenza domestika skont il-liġi.
Bi qbil mal-awtoritajiet edukattivi, il-kontenut tal-videos se jkun integrat fil-kurrikulu tal-PSCD biex jgħin lill-istudenti jħossuhom aktar komdi jitkellmu dwar suġġett sensittiv iżda kruċjali, u biex jifhmu aħjar il-valuri tar-rispett, il-kunsens u r-responsabbiltà personali.
Is-Segretarju Parlamentari għall-Ugwaljanza u r-Riformi, Rebecca Buttigieg, enfasizzat l-importanza tar-rispett lejn xulxin u saħqet li l-edukazzjoni dwar forom differenti ta’ abbuż trid tibda minn età bikrija. Hija qalet li dan il-proġett huwa parti minn sensiela ta’ miżuri li ttieħdu fl-aħħar xhur sabiex tissaħħaħ il-prevenzjoni tal-vjolenza domestika.
Min-naħa tagħha, il-Kummissarju dwar il-Vjolenza Abbażi tal-Ġeneru u l-Vjolenza Domestika, Samantha Pace Gasan, spjegat kif permezz tal-arti u l-kollaborazzjoni qed jinħolqu mezzi ġodda ta’ tagħlim u riflessjoni. Hija sostniet li dawn il-filmati mhux biss se jqajmu kuxjenza, iżda wkoll se jħeġġu lill-istudenti jesprimu l-ħsibijiet u l-esperjenzi tagħhom, filwaqt li jitgħallmu kif ifittxu u jaċċessaw l-għajnuna professjonali meta jkun hemm bżonn.
