Il-programm Life Hack se jkun estiż għal sitt skejjel medji madwar Malta u Għawdex wara s-suċċess tal-fażi pilota tiegħu. Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti, flimkien mal-Kap Eżekuttiv tal-Aġenzija Żgħażagħ Miriam Teuma, ippreżentaw iċ-ċertifikati lill-ewwel grupp ta’ żgħażagħ li temmew b’suċċess dan il-programm.
Matul iċ-ċerimonja tħabbar li, bħala parti mill-miżuri tal-Budget 2026, il-programm se jespandi minn tliet skejjel għal sitt skejjel medji matul is-sena skolastika 2026/2027. B’dan il-pass, aktar studenti tal-ewwel u t-tieni sena tal-iskola sekondarja (Year 7 u 8) se jkollhom aċċess għal diversi korsijiet prattiċi.
Fost il-korsijiet offruti hemm Connected Minds, MoneyWise, Creative Spark u Take Action Through Photos, li huma mfassla biex jgħinu liż-żgħażagħ jiżviluppaw ħiliet importanti bħall-benesseri diġitali, il-ġestjoni tal-flus u l-kreattività.
Iċ-ċertifikati mogħtija lill-istudenti huma akkreditati bħala Level 3 Awards mid-Direttorat għall-Kwalità u Standards fl-Edukazzjoni (DQSE), li jfisser li t-tagħlim mhux formali li jiksbu ż-żgħażagħ jingħata rikonoxximent uffiċjali u jikkontribwixxi għall-profil edukattiv tagħhom.
Is-Segretarju Parlamentari Keith Azzopardi Tanti qal li s-suċċess ta’ dawn iż-żgħażagħ juri kemm huwa importanti li l-pajjiż jinvesti fil-potenzjal tal-ġenerazzjoni li jmiss. Huwa spjega li permezz tal-programm Life Hack, it-tagħlim ma jibqax limitat għall-klassi biss, iżda joffri wkoll ħiliet soċjali u diġitali li jgħinu liż-żgħażagħ fil-ħajja tagħhom ta’ kuljum u fil-futur.
Min-naħa tagħha, Miriam Teuma qalet li dan il-programm huwa possibbli grazzi għall-ħidma tal-youth workers professjonali li jwasslu tagħlim mhux formali ta’ kwalità. Hija żiedet li l-inizjattiva hija konformi mal-politika nazzjonali għaż-żgħażagħ u l-edukazzjoni, filwaqt li r-reazzjonijiet pożittivi mill-istudenti u l-ġenituri juru li l-programm qed jagħti riżultati tajbin.
Permezz ta’ din l-espansjoni, l-Aġenzija Żgħażagħ se tkompli toffri opportunitajiet ġodda li jgħinu liż-żgħażagħ jiżviluppaw ħiliet prattiċi u jippreparaw aħjar għall-futur, filwaqt li tikkonferma l-impenn tal-Gvern li jkompli jinvesti fl-iżvilupp olistiku taż-żgħażagħ Maltin u Għawdxin.
