Il-Kummissjoni Ġimgħa l-Kbira tal-Parroċċa ta’ Ħaż-Żebbuġ se ttella’ attività speċjali biex tfakkar anniversarju importanti marbut mad-devozzjoni lejn il-Kurċifiss.
Fil-fatt, is-Sibt 14 ta’ Marzu 2026 se jittella’ Kunċert ta’ Mużika Sagra li jfakkar 200 sena mill-inawgurazzjoni tal-vara l-kbira tal-Kurċifiss. Din l-attività se ssir fil-Knisja Arċipretali ta’ Ħaż-Żebbuġ u tibda fis-7.30pm.
Il-programm tal-lejla se jinkludi qari ta’ poeżiji u tagħrif storiku relatat mal-vari tal-Ġimgħa l-Kbira, li huma parti importanti mill-wirt reliġjuż u kulturali tal-lokalità.
Il-kunċert se jkun animat mill-Coro Bel Canto, b’akkumpanjament fuq l-arpa minn Jacob Portelli, li flimkien se jwasslu repertorju ta’ mużika sagra adattat għall-ispirtu taż-żmien tar-Randan.
Din l-attività qed tiġi organizzata mill-Kummissjoni Ġimgħa l-Kbira tal-Parroċċa ta’ Ħaż-Żebbuġ, bħala parti mill-attivitajiet li jfakkru dan l-anniversarju storiku u li jkomplu jsaħħu d-devozzjoni lejn il-Kurċifiss u t-tradizzjonijiet tal-Ġimgħa l-Kbira fil-lokalità.
