It-tieni edizzjoni tal-inizjattiva ‘Football for the Goals’ waslet fi tmiemha wara sensiela ta’ tournaments tal-futbol li għaqqdu studenti minn skejjel differenti. Kull skola rċeviet ballun speċjali marbut mal-Għanijiet ta’ Żvilupp Sostenibbli (SDGs), bħala parti minn din l-esperjenza edukattiva.
Din l-inizjattiva, frott kollaborazzjoni bejn il-Ministeru għall-Ambjent u l-Enerġija, il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni u l-Fondazzjoni Inħobb il-Futbol, tkompli tuża l-popolarità tal-futbol biex tressaq lit-tfal eqreb lejn il-valuri tas-sostenibbiltà u tħeġġiġhom jieħdu azzjoni konkreta.
Il-Ministru Miriam Dalli sostniet li inizjattivi bħal dawn jgħinu biex il-prinċipji ta’ żvilupp sostenibbli jidħlu fil-ħajja ta’ kuljum tal-iskejjel. Hija nnutat il-kreattività u l-impenn tal-istudenti fil-proġetti tagħhom, li juru kemm qed jitkabbar sens ta’ responsabbiltà fost iż-żgħażagħ.
Min-naħa tiegħu, il-Ministru Clifton Grima enfasizza li dan il-programm juri kif l-edukazzjoni tista’ tkun esperjenza dinamika li tgħaqqad it-tagħlim mal-valuri u l-ħiliet meħtieġa għall-futur. Huwa qal li studenti qed jitħeġġu mhux biss jitgħallmu, iżda wkoll jieħdu rwol attiv fil-komunità.
Din is-sena pparteċipaw 17-il klassi, b’kull waħda tiffoka fuq wieħed mill-SDGs. L-inizjattiva se tilħaq il-qofol tagħha b’tournament finali ta’ ġurnata sħiħa, li jiċċelebra l-isport flimkien mal-valuri ta’ kollaborazzjoni u sostenibbiltà.
