Ġie introdott kors ġdid immirat lejn ħaddiema minn pajjiżi terzi li diġà jinsabu jaħdmu f’Malta, bil-għan li jsaħħaħ l-għarfien tagħhom tal-kultura u tal-lingwa Maltija. Is-sillabu tal-kors tħejja mill-Ministeru għall-Intern, is-Sigurtà u x-Xogħol u jista’ jiġi offrut minn istituzzjonijiet edukattivi Maltin li huma liċenzjati.
Il-parteċipazzjoni f’dan il-kors hija obbligatorja u tinkludi wkoll eżami finali. L-applikazzjonijiet se jsiru permezz tal-websajt ta’ Identità, filwaqt li l-eżami jkun ikkoordinat mid-Dipartiment tal-Eżamijiet tal-Gvern.
Dan il-programm joffri opportunità biex ħaddiema barranin ikunu eliġibbli għal tiġdid ta’ permess ta’ xogħol għal perjodu itwal. Madankollu, dan jingħata biss jekk il-persuna tkun kisbet taħriġ adegwat jew tkun temmet b’suċċess il-kors u għaddiet mill-eżami.
Il-miżura tifforma parti mill-Malta Labour Migration Policy u għandha l-għan li ġġib aktar stabbiltà fis-suq tax-xogħol. Skont il-Ministru Byron Camilleri, dan il-pass jgħin biex jinħolqu ħaddiema aktar imħarrġa u integrati fis-soċjetà Maltija.
Il-kors huwa obbligatorju għal dawk li jaħdmu f’impjiegi meqjusa “low skilled”, u jkopri diversi oqsma fosthom il-kultura u t-tradizzjonijiet Maltin, il-parteċipazzjoni ċivika, il-liġi, l-iżvilupp personali u professjonali, kif ukoll il-lingwa Maltija u l-Ingliż.
Min-naħa l-oħra, għal impjiegi “higher skilled”, it-tiġdid ta’ sentejn jista’ jingħata abbażi tat-taħriġ. F’ċerti skemi speċjalizzati bħall-KEI, SEI u l-Blue Card, it-tiġdid jista’ jilħaq sa tliet snin. L-istess japplika għal dawk li jiksbu livell ogħla ta’ skills card fit-turiżmu u jkollhom kuntratt ta’ xogħol ta’ tliet snin.
Istituzzjonijiet edukattivi li jixtiequ joffru dan il-kors għandhom jinfurmaw lil Jobsplus permezz ta’ email. Is-sillabu u l-metodu ta’ assessjar qed jiġu ppubblikati flimkien ma’ din l-inizjattiva.
