Nhar il-Ħadd 12 ta’ April 2026, Malta u Għawdex se jkunu xhieda ta’ inizjattiva unika u ambizzjuża organizzata minn Calypso Radio, bil-għan li tinkiser rekord ġdid: dak tal-akbar numru ta’ bnadar imtellgħin fl-istess ħin fuq arbli madwar il-gżejjer Maltin.
Din l-attività qed tħeġġeġ lill-pubbliku kollu – minn familji sa għaqdiet lokali – biex jipparteċipaw billi jtellgħu bandiera fuq arblu, kemm jekk fuq bejt ta’ dar, każin tal-banda, skola jew kwalunkwe spazju ieħor addattat. L-għan hu wieħed ċar: li flimkien jinħoloq spettaklu viżiv impressjonanti li juri l-għaqda u l-kburija nazzjonali.
Il-parteċipanti jistgħu jagħżlu li jtellgħu kwalunkwe tip ta’ bandiera, fosthom dik nazzjonali, emblemi ta’ każini tal-banda jew anke bnadar marbuta mal-festi tradizzjonali Maltin – simboli li jirriflettu l-identità u l-wirt kulturali tal-komunitajiet tagħna.
Bħala parti mill-inizjattiva, dawk li jieħdu sehem huma mistiedna jieħdu ritratt tal-bandiera tagħhom fuq l-arblu u jaqsmuh fil-kummenti tal-post uffiċjali fuq Facebook ta’ Calypso Radio, li se jkun imwaħħal fil-quċċata tal-paġna dakinhar stess. Dan mhux biss jgħin biex jiġi dokumentat ir-rekord, iżda jkompli jsaħħaħ sens ta’ komunità u parteċipazzjoni kollettiva.
Din l-attività mhijiex biss tentattiv ta’ rekord, iżda wkoll ċelebrazzjoni tal-għaqda, il-kreattività u t-tradizzjonijiet Maltin u Għawdxin. Inizjattiva li tħeġġeġ lil kulħadd biex ikun parti minn mument storiku u memorabbli għall-gżejjer tagħna.
Ejja nagħmlu l-istorja flimkien!
