Tnediet uffiċjalment l-Istrateġija 2030 tal-Kunsill Malti għall-Arti, dokument ġdid li se jiggwida l-iżvilupp tas-setturi kulturali u kreattivi f’Malta għas-snin li ġejjin. L-istrateġija ġiet ippreżentata quddiem diversi stakeholders, artisti u rappreżentanti tas-settur, u għandha l-għan li twieġeb għall-isfidi u r-realtajiet attwali b’mod aktar strutturat u prattiku.
Il-Ministru Owen Bonnici enfasizza li din l-istrateġija turi l-impenn tal-Gvern biex ipoġġi l-kultura u l-arti fil-qalba tal-iżvilupp fit-tul tal-pajjiż, filwaqt li jinħolqu kundizzjonijiet aħjar biex artisti u organizzazzjonijiet ikunu jistgħu jikbru b’mod sostenibbli u jippjanaw għall-futur.
Min-naħa tiegħu, iċ-Chairman Eżekuttiv tal-Kunsill, Dr Luke Dalli, spjega li l-istrateġija mhijiex biss dokument, iżda pass importanti lejn settur aktar b’saħħtu, inklussiv u miftuħ għal kulħadd, fejn il-kreattività titqies bħala element ċentrali tal-identità u l-iżvilupp tal-pajjiż.
Id-Direttur tal-Istrateġija, Daniel Azzopardi, żied li biex is-settur jikber b’mod effettiv hemm bżonn kundizzjonijiet konkreti bħal ippjanar fit-tul, aċċess akbar u opportunitajiet ċari għall-iżvilupp professjonali tal-artisti.
Il-ko-awtriċi tal-istrateġija, il-Professur Valerie Visanich, saħqet li dan huwa qafas ħaj u dinamiku, mibni fuq riċerka u konsultazzjoni kontinwa mas-settur, li jirrifletti l-kumplessità tal-ekosistema kulturali.
L-Istrateġija 2030 hija mibnija fuq tliet pilastri ewlenin: l-iżvilupp professjonali, id-drittijiet kulturali u l-internazzjonalizzazzjoni. Barra minn hekk, tinkludi 55 azzjoni konkreta li se jkunu implimentati permezz ta’ pjanijiet dettaljati, monitoraġġ regolari u evalwazzjoni kontinwa, bil-għan li tiġi żgurata trasparenza u progress sostenibbli.
Id-dokument sħiħ huwa disponibbli online fuq is-sit tal-Kunsill Malti għall-Arti: https://artscouncilmalta.gov.mt
