Tnieda proġett ġdid biex jitjieb u jiġi ppreservat is-sit ta’ Għar Ħasan f’Ħal Far, b’enfasi fuq il-ħarsien tal-valur storiku u naturali tiegħu filwaqt li jsir aktar aċċessibbli għall-pubbliku.
Il-Ministru Owen Bonnici spjega li din iż-żona, li tkopri madwar 5,000 metru kwadru, għandha importanza kbira mhux biss mill-aspett arkeoloġiku u storiku, iżda wkoll minħabba l-leġġendi u t-tradizzjonijiet marbuta magħha. Huwa saħaq li l-għan ewlieni tal-proġett huwa li s-sit jiġi mħares aħjar u fl-istess ħin ikun aktar sigur għal min iżuru.
Ix-xogħlijiet ippjanati jinkludu tindif ġenerali tal-iskart, tiswija ta’ partijiet li sofrew ħsara, tisbiħ tal-ambjent u restawr ta’ struttura storika mill-perjodu Ingliż. Barra minn hekk, se tinħoloq żona ta’ protezzjoni bejn it-triq u s-sit biex tissaħħaħ il-konservazzjoni tiegħu.
Dan il-proġett għandu wkoll l-għan li jagħti ħajja ġdida lill-post billi jinbidel f’żona aktar organizzata u aċċessibbli, fejn il-pubbliku jista’ jgawdi l-ambjent b’mod responsabbli u sostenibbli. Se jiżdiedu wkoll faċilitajiet bħal bankijiet u mwejjed, iżda b’attenzjoni biex ma jintilifx il-karattru naturali u storiku tas-sit.
Il-proċess kollu, inklużi l-permessi u t-tħejjija tad-dokumenti, qed jiġi mmexxi mid-Dipartiment tar-Restawr u l-Preservazzjoni. Min-naħa tiegħu, il-Kap Eżekuttiv tal-Awtorità tal-Artijiet Robert Vella enfasizza li dan il-proġett juri impenn ċar lejn ġestjoni aħjar tal-art pubblika, filwaqt li jinżamm bilanċ bejn il-konservazzjoni u l-użu mill-komunità.
Għat-tnedija kienu preżenti wkoll rappreżentanti tal-Kunsill Lokali ta’ Birżebbuġa.
