Malta tħares lejn rotot tal-ajru fit-tul biex issaħħaħ il-futur tat-turiżmu

Il-futur tat-turiżmu f’Malta jiddependi dejjem aktar fuq kif il-pajjiż isaħħaħ il-konnettività bl-ajru, b’mod partikolari permezz ta’ rotot ġodda fit-tul lejn swieq ’il bogħod bħall-Amerika ta’ Fuq u l-Asja. Din kienet il-messaġġ ewlieni waqt konferenza dwar l-avjazzjoni organizzata minn Deloitte Malta, fejn ġiet enfasizzata r-rabta diretta u kruċjali bejn l-ivvjaġġar bl-ajru u s-settur turistiku.

Id-Deputat Prim Ministru u Ministru għat-Turiżmu, Ian Borg, spjega kif Malta trid tkompli tibni fuq is-suċċess tagħha f’rotot qosra lejn destinazzjonijiet Ewropej, iżda fl-istess ħin tiftaħ orizzonti ġodda b’titjiriet fit-tul li jġibu aktar viżitaturi minn swieq differenti. Huwa semma wkoll it-titjiriet diretti li mistennija jibdew bejn Malta u New York bħala eżempju konkret ta’ kif strateġija fit-tul tista’ twassal għal riżultati konkreti.

Borg saħaq li, bħala pajjiż gżira, Malta tiddependi kważi kompletament fuq l-avjazzjoni biex tibqa’ konnessa mad-dinja. Fil-fatt, aktar minn 98% tat-turisti jaslu bil-ajru, fatt li jagħmel il-konnettività element deċiżiv għall-kompetittività tal-pajjiż.

Huwa żied li l-istrateġija nazzjonali qed tiffoka fuq żvilupp ta’ rotot ġodda, aktar diversifikazzjoni tas-swieq u aċċessibbiltà matul is-sena kollha, bil-għan li jinkiseb tkabbir aktar sostenibbli u ekonomija aktar reżiljenti.

Fl-istess waqt, Borg appella għal aktar kollaborazzjoni bejn il-gvern, l-awtoritajiet, il-linji tal-ajru u l-operaturi tal-industrija. Saħaq li hemm bżonn ta’ qafas regolatorju stabbli u ċar li jagħti fiduċja lill-investituri, filwaqt li ħeġġeġ lill-industrija tkun aktar innovattiva u tħares lejn tkabbir li jkun allinjat mal-viżjoni fit-tul tal-pajjiż.

Il-konferenza serviet bħala pjattaforma importanti biex l-esperti u dawk involuti fis-settur jiddiskutu kif Malta tista’ tibqa’ kompetittiva f’suq turistiku dejjem aktar globali u dinamiku.