Id-Deputat Prim Ministru u Ministru għall-Affarijiet Barranin u t-Turiżmu Ian Borg enfasizza kemm hu importanti li l-pajjiżi jkunu ppreparati u reżiljenti quddiem il-bidliet ekonomiċi globali, waqt li kien qed jindirizza summit dwar il-kummerċ tal-Commonwealth of Nations f’London.
Huwa sostna li s-sistema kummerċjali globali diġà qed tinbidel, u li l-isfida issa hi li jinbena mudell ġdid li jiffoka mhux biss fuq il-profitt, iżda wkoll fuq is-sigurtà u r-reżiljenza. Skont Borg, il-kummerċ illum qed jitmexxa aktar minn relazzjonijiet ta’ fiduċja u sħubijiet strateġiċi milli minn globalizzazzjoni tradizzjonali.
F’dan il-kuntest, Malta qed timxi lejn mudell ta’ “interdipendenza selettiva”, fejn il-katini tal-provvista u r-rabtiet bejn pajjiżi jsiru assi strateġiċi. Huwa saħaq li dawk li jibnu dawn ir-relazzjonijiet u jattiraw investiment se jkunu l-aktar li jiffurmaw il-futur ekonomiku.
Matul is-summit, Borg ħabbar ukoll li Malta ħatret lil Michaela Muscat Spaak bħala l-ewwel mibgħuta tal-Gvern għall-kummerċ u l-investiment fil-Commonwealth. Ir-rwol tagħha se jkun li tgħin lin-negozji Maltin jespandu barra u joħolqu konnessjonijiet ġodda.
B’ħarsa lejn il-Commonwealth Heads of Government Meeting 2026, Borg appella lill-pajjiżi membri biex jgħaddu mill-kliem għall-azzjoni, billi jsaħħu s-sħubijiet u jħaffu l-investiment.
Huwa semma wkoll kif Malta qed tibni fuq setturi ewlenin bħas-servizzi finanzjarji, il-loġistika, l-avjazzjoni u l-qasam marittimu, filwaqt li qed timxi minn ekonomija bbażata fuq il-volum għal waħda ffukata fuq il-valur.
Fl-aħħar nett, Borg elenka erba’ prijoritajiet ewlenin: il-bini ta’ netwerks ta’ fiduċja, l-investiment fir-reżiljenza u l-infrastruttura diġitali, Stati aktar effettivi, u aktar kollaborazzjoni bejn pajjiżi.
Waqt iż-żjara tiegħu f’Londra, huwa kellu wkoll laqgħat ma’ diversi mexxejja tal-Commonwealth, fosthom Jonathan Marland, li jmexxi l-Commonwealth Enterprise and Investment Council.
