Ġie ffirmat ftehim bejn l-Esplora, Xjenza Malta u The Malta Trust Foundation bil-għan li jissaħħaħ it-tagħlim inklużiv u aċċessibbli. Din is-sħubija se twassal għal sessjonijiet edukattivi ġodda f’kamra multi-sensorjali fl-Esplora, li se jkunu mfassla apposta biex jilqgħu għal bżonnijiet differenti.
L-inizjattiva tiffoka fuq l-involviment ta’ persuni fuq l-ispektrum tal-awtiżmu u oħrajn b’bżonnijiet speċifiċi, permezz ta’ programm immexxi minn prattikanti tal-arti kkwalifikati. Dan jirrifletti approċċ modern lejn l-innovazzjoni, fejn mhux biss it-teknoloġija hi importanti, iżda wkoll servizzi li jsaħħu l-inklużjoni soċjali.
Is-Segretarju Parlamentari Keith Azzopardi Tanti sostna li kollaborazzjonijiet bħal dawn iħallu impatt konkret fuq il-komunità, billi jtejbu l-aċċess u jsaħħu l-parteċipazzjoni taċ-ċittadini, filwaqt li joffru esperjenzi aħjar għal kulħadd.
Il-President Emeritus Marie-Louise Coleiro Preca, fundatriċi ta’ The Malta Trust Foundation, iddeskriviet dan il-ftehim bħala pass importanti lejn inklużjoni konkreta, fejn tfal u adulti b’bżonnijiet differenti mhux biss jiġu milqugħa, iżda jingħataw opportunitajiet reali biex jipparteċipaw b’mod attiv permezz ta’ esperjenzi ta’ kwalità.
Min-naħa tagħha, id-Direttur Anzjan tal-Esplora, Mary Ann Cauchi, enfasizzat li din il-kollaborazzjoni tkompli ssaħħaħ il-missjoni taċ-ċentru biex ix-xjenza u t-tagħlim ikunu aċċessibbli għal kulħadd, filwaqt li jilħaq komunitajiet diversi b’modi kreattivi u inklużivi.
Dan il-proġett jagħmel parti mill-iżvilupp kontinwu tal-Esplora u l-pjanijiet tiegħu għall-futur, u juri l-impenn biex il-faċilitajiet edukattivi jkunu mfassla skont il-bżonnijiet reali tas-soċjetà, b’enfasi fuq ugwaljanza u inklużjoni.
