Ġiet imnedija sensiela ta’ ċelebrazzjonijiet li jfakkru 70 sena mit-twaqqif tad-Dipartiment tas-Sigurtà Soċjali f’Malta, b’enfasi fuq il-progress u l-appoġġ li dan is-settur ta tul is-snin lill-familji Maltin u Għawdxin.
Il-programm, li jinfirex fuq xahar sħiħ, ipoġġi fil-qalba tiegħu lill-familji u lill-pensjonanti, filwaqt li juri kif il-benefiċċji soċjali baqgħu relevanti u importanti fil-ħajja ta’ kuljum tan-nies.
Is-sistema tas-sigurtà soċjali bdiet formalment fl-1956 u minn dak iż-żmien ’l hawn evolviet minn skemi sempliċi għal sistema moderna u komprensiva. Tul is-snin ġew introdotti diversi benefiċċji bħall-pensjonijiet u allowances differenti, kollha regolati mill-liġi tas-Sigurtà Soċjali, li kompliet tissaħħaħ maż-żmien biex toffri aktar protezzjoni.
Il-Ministru Michael Falzon sostna li dawn is-snin juru impenn qawwi lejn il-ġustizzja soċjali u s-solidarjetà, b’żidiet kontinwi fil-pensjonijiet u benefiċċji oħra bħal Children’s Allowance u In-work Benefit. Huwa enfasizza li biss din is-sena ġew implimentati aktar minn 50 miżura soċjali, b’impenn li dan ix-xogħol ikompli.
Fl-istess waqt, l-investiment fil-benefiċċji soċjali laħaq livell rekord fl-2025, b’nefqa ta’ madwar €1.62 biljun, li tirrappreżenta parti sostanzjali mill-infiq tal-Gvern u żieda qawwija meta mqabbla ma’ snin preċedenti.
Is-Segretarju Permanenti Mark Musu ddeskriva dawn iċ-ċelebrazzjonijiet bħala riflessjoni tal-kisbiet tal-poplu Malti, u sostna li Malta tispikka għall-impenn tagħha lejn is-solidarjetà soċjali u l-appoġġ lil min għandu bżonn, filwaqt li tkompli tiftaħ opportunitajiet ġodda għal kulħadd.
