F’San Vinċenz de Paul ġiet inawgurata sala ġdida psikoġerjatrika, inizjattiva li timmarka pass importanti fit-titjib tas-servizzi tas-saħħa għall-anzjani. Għall-ftuħ attendew il-Ministru għas-Saħħa u l-Anzjanità Attiva, Jo Etienne Abela, flimkien mas-Segretarju Parlamentari Malcolm Paul Agius Galea.
Din is-sala, l-ewwel waħda tax-xorta tagħha f’din il-faċilità, hija maħsuba biex tilqa’ sa 24 anzjan li qed jiffaċċjaw kundizzjonijiet mediċi u mentali kumplessi. L-għan tagħha hu li toffri kura aktar speċjalizzata u koordinata, f’kuntest fejn il-bżonnijiet tal-anzjani qed isiru dejjem aktar varjati u esiġenti.
Is-servizz se jiffoka fuq approċċ olistiku, li mhux biss jindirizza l-kundizzjoni fiżika tal-pazjenti, iżda wkoll is-saħħa mentali tagħhom. Dan ifisser li l-kura mogħtija tmur lil hinn mill-metodi tradizzjonali, u tqis il-persuna kollha kemm hi.
Barra minn hekk, is-sala l-ġdida se tgħin biex timla vojt importanti bejn il-kura fit-tul fir-residenzi tal-anzjani u trattament aktar intensiv fl-isptar. B’hekk, pazjenti li għandhom bżonn kura speċjalizzata iżda mhux neċessarjament rikoveru fl-isptar, se jkollhom servizz aktar adattat u uman.
Il-faċilità se tkun immexxija minn tim multidixxiplinarju li jinkludi psikjatri, ġerjatriċi u infermiera, kollha ddedikati biex jiżguraw kura ta’ livell għoli u professjonali.
Fil-kummenti tiegħu, il-Ministru Abela enfasizza li dan il-proġett huwa parti minn viżjoni usa’ ta’ modernizzazzjoni u integrazzjoni tas-servizzi f’San Vinċenz de Paul, bil-għan li dejjem titqiegħed id-dinjità u l-benesseri tal-pazjent fiċ-ċentru. Huwa tenna wkoll l-impenn tal-Gvern biex ikompli jsaħħaħ is-servizzi tas-saħħa mentali fil-komunità u jindirizza l-istigma marbuta magħhom.
Min-naħa tiegħu, is-Segretarju Parlamentari Malcolm Paul Agius Galea rringrazzja lill-amministrazzjoni u lill-ħaddiema kollha li ħadmu biex dan il-proġett jitwettaq. Huwa sostna li din is-sala hija parti minn sensiela ta’ titjib li qed jagħmlu lil San Vinċenz de Paul ċentru li joffri kura aktar komprensiva u ffukata fuq il-bżonnijiet reali tal-anzjani.
Huwa temm billi enfasizza li, apparti l-investiment fl-infrastruttura, qed tingħata importanza kbira wkoll lill-iżvilupp tal-professjonisti, sabiex il-kwalità tas-servizzi tibqa’ dejjem fost l-aqwa.
