Investiment ġdid ta’ €150 miljun fis-settur tal-MedTech minn Vantive se jwassal għall-ħolqien ta’ 250 impjieg ġdid ta’ livell għoli, filwaqt li jkompli jsaħħaħ il-pożizzjoni ta’ Malta bħala ċentru Ewropew għal industriji avvanzati u ta’ valur miżjud.
Il-Prim Ministru Robert Abela, flimkien mal-Ministru għall-Ekonomija Silvio Schembri, ħabbar dan il-proġett li se jinkludi faċilitajiet moderni ta’ manifattura u riċerka. Dawn se jservu bħala ċentru globali għall-produzzjoni ta’ apparat mediku essenzjali, partikolarment relatat ma’ trattamenti għall-mard tal-kliewi. Ix-xogħol fuq is-sit mistenni jibda dalwaqt.
Il-Prim Ministru ddeskriva dan l-investiment bħala wieħed storiku, u qal li huwa l-akbar investiment dirett barrani li qatt sar f’Malta. Huwa enfasizza li dan jirrifletti l-kapaċità tal-pajjiż li jattira investiment f’setturi ta’ kwalità li huma parti mill-viżjoni fit-tul tal-pajjiż, fosthom il-Viżjoni Malta 2050.
Dr Abela spjega wkoll li fattur importanti għall-għażla ta’ Malta kien l-istabbiltà fil-prezzijiet tal-enerġija, u sostna li pajjiżna baqa’ ma żiedx il-prezzijiet tal-elettriku, il-fjuwil u l-ilma għal snin sħaħ. Huwa żied li l-fatt li kumpanija internazzjonali ta’ dan il-livell tagħżel lil Malta juri fiduċja fl-istabbiltà u fid-direzzjoni ekonomika tal-pajjiż.
Dan l-investiment se jsaħħaħ is-settur tal-manifattura avvanzata f’Malta, billi jġib miegħu ħiliet speċjalizzati u opportunitajiet ta’ tkabbir fit-tul. Il-prodotti li se jiġu manifatturati mistennija jikkontribwixxu direttament għat-titjib tal-kura tas-saħħa għal pazjenti madwar id-dinja.
Min-naħa tiegħu, il-Ministru Schembri qal li dan il-proġett huwa r-riżultat ta’ xhur ta’ ħidma u negozjati biex Malta tattira investiment ta’ valur għoli f’ambjent globali kompetittiv. Huwa sostna li dan huwa eżempju ċar tat-tip ta’ industriji li Malta trid tattira – dawk ibbażati fuq innovazzjoni, teknoloġija u esportazzjoni.
Huwa appella wkoll liż-żgħażagħ biex jinvestu fl-edukazzjoni u t-taħriġ f’oqsma bħall-MedTech, il-farmaċewtika u t-teknoloġija avvanzata, sabiex ikunu jistgħu jieħdu vantaġġ minn dawn l-opportunitajiet ġodda.
Rappreżentant ta’ Vantive, Brian Tabone, spjega li l-kumpanija għażlet lil Malta minħabba r-reputazzjoni tagħha fil-manifattura, il-pożizzjoni strateġika u l-forza tax-xogħol kwalifikata. Huwa qal li l-investiment se jgħin lill-kumpanija tespandi l-operat tagħha filwaqt li tkompli tipprovdi soluzzjonijiet mediċi essenzjali għal pazjenti li jbatu minn mard tal-kliewi.
