Se jitwettaq proġett estensiv ta’ tisbiħ u estensjoni tal-mużew tal-Konkatidral ta’ San Ġwann biex jissaħħaħ il-valur kulturali tas-sit u tittejjeb l-esperjenza tal-viżitaturi.
Permezz ta’ investiment ta’ €5 miljun minn Fondi Ewropej, il-proġett se joffri esperjenza aktar moderna, sostenibbli u aċċessibbli, filwaqt li jiżgura l-konservazzjoni fit-tul ta’ kollezzjonijiet artistiċi u storiċi ta’ importanza kbira.
Ix-xogħlijiet se jinkludu l-bini ta’ mużew ġdid kif ukoll ir-restawr u l-adattament ta’ strutturi eżistenti. Dan se jagħmilha possibbli li jiġu esebiti kollezzjonijiet prezzjużi bħal tapizzeriji storiċi, ilbies sagru, kotba korali u xogħlijiet ta’ Mattia Preti f’ambjent modern li jilħaq standards internazzjonali.
Il-mużew se jinkludi wkoll spazji ġodda bħas-sala tat-tapizzeriji, flimkien ma’ faċilitajiet moderni u teknoloġiji diġitali u edukattivi biex l-esperjenza tal-viżitaturi tkun aktar interattiva u informattiva.
Il-Ministru Stefan Zrinzo Azzopardi qal li dan il-proġett juri kif il-Fondi Ewropej qed jintużaw biex jitħares u jissaħħaħ il-wirt kulturali Malti, filwaqt li joħolqu benefiċċji għall-kultura, l-edukazzjoni, il-kwalità tal-ħajja u t-turiżmu sostenibbli.
Il-Kap Eżekuttiv tal-Fondazzjoni tal-Katidral, Tonio Mallia, sostna li l-investiment se jgħin biex il-wirt uniku tal-Konkatidral jiġi ppreżentat u ppreservat b’mod modern u professjonali, filwaqt li joffri esperjenza aktar edukattiva u sinifikanti għall-pubbliku.
Il-proġett se jinkludi wkoll titjib fl-aċċessibbiltà permezz ta’ teknoloġiji assistivi u faċilitajiet ġodda sabiex persuni b’diżabilità jkunu jistgħu jgawdu s-sit b’mod aktar faċli.
Dan l-investiment ikompli jsaħħaħ il-qasam kulturali u turistiku ta’ Malta permezz ta’ użu effettiv tal-Fondi Ewropej.
Ritratti: MFI
