Infetaħ uffiċjalment il-Padiljun ta’ Malta fil-61 edizzjoni ta’ La Biennale di Venezia 2026, fejn pajjiżna qed jipparteċipa b’wirja artistika kontemporanja li tpoġġi lill-artisti Maltin fuq pjattaforma internazzjonali prestiġjuża.
Il-padiljun Malti, bl-isem No Need to Sparkle: Experiments in Love and Revolution, jinsab fl-Arsenale u jiġbor flimkien ix-xogħlijiet tal-artisti Adrian MM Abela, Charlie Cauchi u Raphael Vella. Il-proġett qed jiġi ppreżentat taħt il-kurazzjoni ta’ Margerita Pulè u b’disinn arkitettoniku ta’ SON Architects.
Il-Kunsill Malti għall-Arti spjega li din il-parteċipazzjoni tkompli turi kemm l-arti kontemporanja Maltija qed tikber u tikseb viżibbiltà barra minn xtutna, filwaqt li tagħti spazju lil artisti multidixxiplinari u sperimentali biex jesprimu temi universali bħal identità, memorja, poter u reżistenza.
Iċ-Chairman Eżekuttiv tal-Kunsill Malti għall-Arti, Dr Luke Dalli, qal li l-preżenza kontinwa ta’ Malta fil-Biennale tifforma parti mill-viżjoni fit-tul tal-kunsill biex tissaħħaħ l-internazzjonalizzazzjoni tal-arti Maltija. Huwa sostna li dan il-padiljun jirrifletti kemm il-kwalità kif ukoll il-maturità tas-settur kulturali Malti, filwaqt li juri l-importanza tal-kollaborazzjoni bejn l-istituzzjonijiet pubbliċi u s-settur indipendenti.
Min-naħa tagħha, id-Direttur tal-Internazzjonalizzazzjoni fi ħdan il-Kunsill Malti għall-Arti, Anabelle Stivala, qalet li inizjattivi bħal dawn joħolqu opportunitajiet ġodda għall-artisti Maltin, isaħħu relazzjonijiet ma’ professjonisti kulturali internazzjonali u jkomplu jkabbru l-ekoloġija kulturali ta’ Malta.
Il-padiljun jidħol ukoll f’djalogu mat-tema tal-Biennale ta’ din is-sena, In Minor Keys, billi jesplora temi relatati mal-awtentiċità, il-katarsi u l-kunċett tan-nazzjon. Permezz ta’ installazzjonijiet differenti li jgħaqqdu filmati, skultura, animazzjoni u elementi ta’ protesta, il-wirja toħloq spazju għal riflessjoni, empatija u umoriżmu.
Il-kuratriċi Margerita Pulè spjegat li l-kunċett tal-padiljun jistieden lill-viżitaturi jirriflettu fuq id-dubji, il-miti u l-konvinzjonijiet tagħhom stess, filwaqt li jqis dawn l-elementi bħala punt ta’ tluq għal fehim aktar profond tad-dinja ta’ madwarna.
Il-Padiljun ta’ Malta fil-Biennale ta’ Venezja se jkun miftuħ għall-pubbliku bejn id-9 ta’ Mejju u t-22 ta’ Novembru 2026.
