Il-Gżira se tikseb spazju miftuħ ġdid għall-komunità permezz ta’ proġett estensiv ta’ €10 miljun li se jara r-riabilitazzjoni tal-pumping station storika fil-lokalità. Il-proġett mhux biss se jirrestawra binja Neogotika ta’ Grad 1, iżda se jiftaħha għall-pubbliku għall-ewwel darba fl-istorja tagħha permezz ta’ ġnien ġdid imfassal b’rispett lejn il-wirt storiku tal-post.
Il-pjanijiet ġew ippreżentati mill-Ministru Miriam Dalli u l-Ministru Byron Camilleri, li spjegaw kif dan il-proġett se jgħaqqad il-konservazzjoni storika ma’ spazji moderni għall-komunità. Il-pumping station, li għal aktar minn seklu kellha rwol importanti fl-infrastruttura tal-ilma f’Malta, se tingħata ħajja ġdida filwaqt li tibqa’ tħaddan il-karatteristiċi oriġinali tagħha.
Il-ġnien il-ġdid se jkun l-aktar element viżibbli tal-proġett u se jkun miftuħ għall-pubbliku. Se jsir xogħol ta’ landscaping, jinħolqu spazji fid-dell fejn wieħed jista’ joqgħod bilqiegħda u żoni oħra għal attivitajiet komunitarji u rikreazzjoni ta’ kuljum. Il-proġett jinkludi wkoll sistemi sostenibbli bħall-ġbir tal-ilma tax-xita, dawl modern u l-użu ta’ pjanti lokali li jifilħu n-nixfa.
Żewġ daħliet ġodda minn Triq Luqa Briffa u Triq D’Argens se jgħaqqdu mill-ġdid is-sit mal-bqija tal-lokalità, wara li għal snin twal kien iżolat mill-komunità permezz ta’ ħajt li kien jagħlaq l-aċċess għall-art.
Il-Ministru Miriam Dalli qalet li dan il-proġett huwa maħsub biex joħloq spazju għall-familji, għat-tfal u għall-anzjani, filwaqt li juri kif il-wirt storiku u l-infrastruttura moderna jistgħu jimxu flimkien. Hija sostniet li dan għandu jkun mudell għal proġetti oħra simili fil-pajjiż.
Min-naħa tiegħu, il-Ministru Byron Camilleri enfasizza li l-proġett se jindirizza diversi ħtiġijiet tal-lokalità, fosthom dawk soċjali, kulturali u ambjentali, filwaqt li jsaħħaħ il-kwalità tal-ħajja tar-residenti.
Il-Kap Eżekuttiv tal-Korporazzjoni għas-Servizzi tal-Ilma, Karl Cilia, spjega li dan huwa wieħed mill-aktar interventi importanti fuq il-wirt storiku relatat mal-infrastruttura tal-ilma li qatt saru f’Malta. Huwa qal li, apparti r-restawr tal-binja u t-titjib tas-sistemi operattivi tagħha, għall-ewwel darba l-artijiet tal-pumping station se jkunu aċċessibbli għall-pubbliku bħala ġnien ġdid.
Il-proġett qed jitmexxa b’kollaborazzjoni mal-istudjo Malti AP Valletta, magħruf għall-ħidma tiegħu fil-qasam tal-wirt sostenibbli. Parti oħra importanti tax-xogħol hija r-restawr tat-torri tal-ilma tal-konkrit rinfurzat li jinsab fis-sit, xogħol li qed jitmexxa mill-Fakultà għall-Ambjent Mibni tal-Università ta’ Malta taħt it-tmexxija tal-Professur Ruben Paul Borg.
Meta jitlestew ix-xogħlijiet, il-pumping station mhux biss se tibqa’ tintuża għall-funzjonijiet tagħha relatati mal-ilma, iżda se tilqa’ wkoll lill-Kunsill Lokali tal-Gżira, u b’hekk il-binja storika se tingħata funzjoni ċivika ġdida fil-qalba tal-komunità.
