In-nomini għall-premjijiet annwali tal-Kunsill Malti għall-Arti jagħlqu fl-1 ta’ Settembru f’nofsinhar
Fadal biss ftit jiem biex jitressqu n-nomini għall-Premju għall-Arti 2026, bil-perjodu tan-nomini jagħlaq fl-1 ta’ Settembru f’nofsinhar.
Il-Premju għall-Arti, organizzat mill-Kunsill Malti għall-Arti, huwa ċelebrazzjoni annwali tal-eċċellenza, l-innovazzjoni u s-suċċessi fis-setturi kulturali u kreattivi. Din hija l-aħħar opportunità għall-artisti, il-prattikanti kreattivi, l-organizzazzjonijiet, il-produtturi, l-entitajiet pubbliċi u privati, kif ukoll għall-membri tal-pubbliku, biex jirrikonoxxu xogħlijiet, proġetti, produzzjonijiet, inizjattivi u kisbiet li taw kontribut sinifikanti lill-ħajja kulturali f’Malta.
Il-Kunsill Malti għall-Arti diġà rċieva numru sostanzjali ta’ nomini għall-edizzjoni ta’ din is-sena, b’firxa wiesgħa ta’ xogħlijiet, proġetti u kisbiet imressqa għall-kunsiderazzjoni. Ir-rispons jirrifletti l-impenn kontinwu tas-setturi kulturali u kreattivi f’Malta, kif ukoll il-varjetà u d-dinamika tal-attività artistika li qed issir madwar il-pajjiż.
L-edizzjoni tal-2026 se tirrikonoxxi xogħol artistiku li ġie ppreżentat pubblikament bejn l-1 ta’ Settembru 2025 u l-31 ta’ Awwissu 2026. Fost in-nomini eliġibbli jistgħu jkun hemm programmi, wirjiet, spettakli, pubblikazzjonijiet, screenings, xogħlijiet maħruġa, produzzjonijiet artistiċi, proġetti, avvenimenti, films, inizjattivi u xogħlijiet kreattivi oħra.
Jistgħu jiġu nnominati individwi, organizzazzjonijiet, kollettivi, NGOs kulturali, kumpaniji u impriżi li joperaw fis-setturi kulturali u kreattivi, kif ukoll entitajiet pubbliċi u produtturi lokali tal-films. Il-persuni nominati jridu jkunu Maltin jew ibbażati f’Malta, filwaqt li l-gruppi u l-kollettivi għandhom ikunu primarjament ibbażati u joperaw minn Malta.
Huma eliġibbli kemm xogħlijiet oriġinali kif ukoll adattamenti.
In-nomini jistgħu jitressqu mill-membri tal-pubbliku, artisti u prattikanti kreattivi, produtturi u promoturi, organizzazzjonijiet kulturali, entitajiet pubbliċi u entitajiet privati. Jistgħu wkoll jiġu aċċettati nomini mill-kandidati nfushom, li huma mħeġġa jagħmlu dan.
B’differenza mill-edizzjonijiet preċedenti, għall-Premju għall-Arti 2026 in-nomini qed jinġabru mingħajr kategoriji ta’ premjijiet definiti minn qabel. Wara li jagħlaq il-perjodu tan-nomini, il-Kunsill Malti għall-Arti se jeżamina s-sottomissjonijiet eliġibbli u jistabbilixxi l-kategoriji li se jiffurmaw parti mill-proċess ta’ applikazzjoni u evalwazzjoni li jsegwi.
In-nomini għandhom jitressqu permezz tal-Formola Google uffiċjali tal-Premju għall-Arti 2026, filwaqt li l-linji gwida sħaħ huma disponibbli mill-Kunsill Malti għall-Arti.
Għal aktar informazzjoni u biex titressaq nomina, żur il-websajt tal-Kunsill Malti għall-Arti: https://artscouncilmalta.org.mt.
Ritratt: Darren Agius
