Malta issa saret uffiċjalment Stat Membru ta’ Eurimages, il-fond tal-Kunsill tal-Ewropa li jappoġġja l-produzzjoni tal-films. Dan l-iżvilupp jirrappreżenta pass sinifikanti għas-settur awdjoviżiv Malti u jsaħħaħ l-integrazzjoni tiegħu fix-xena kulturali Ewropea.
Il-Ministru għall-Kultura, l-Artijiet u l-Gvern Lokali Owen Bonnici qal li din is-sħubija hija pass strateġiku għall-industrija lokali u saħaq li Malta qed tkompli tinvesti fis-setturi kulturali u kreattivi permezz ta’ sistemi bbażati fuq it-trasparenza u l-mertu. Skontu, l-adeżjoni ma’ Eurimages toħloq opportunitajiet ġodda għall-produtturi Maltin biex jaħdmu ma’ sħab internazzjonali u jikkompetu b’mod aktar b’saħħtu fuq livell Ewropew.
Il-proċess biex Malta ssir membru kien wieħed estensiv u mmexxi mill-Kunsill Malti għall-Arti. F’dan il-kuntest, delegazzjoni Maltija marret Strasburgu sabiex tippreżenta u tiddefendi r-rapport tal-adeżjoni quddiem ir-rappreżentanti ta’ Eurimages.
Iċ-Chairman Eżekuttiv tal-Kunsill Malti għall-Arti, Luke Dalli, iddeskriva dan il-pass bħala wieħed storiku għaċ-ċinema Maltija. Huwa qal li l-produtturi lokali issa qed jidħlu b’mod aktar determinat fid-dinja tal-koproduzzjoni Ewropea, b’aċċess għal netwerks, sħab u finanzjament li jistgħu jdawru l-ideat u l-ambizzjonijiet tagħhom f’proġetti reali. Dan mhux biss jagħraf il-kwalità tal-produzzjoni Maltija, iżda jiftaħ il-bibien biex l-istejjer Maltin jitwasslu u jinqasmu ma’ udjenzi internazzjonali.
Eurimages ilu jopera mill-1989 u llum jinkludi 38 Stat Membru tal-Kunsill tal-Ewropa, flimkien mal-Kanada. Il-fond għandu baġit annwali ta’ madwar €27.5 miljun, iffinanzjat mill-kontribuzzjonijiet tal-pajjiżi membri u mir-ritorni fuq is-self mogħti.
Bis-sħubija ta’ Malta f’Eurimages, il-produtturi Maltin se jkunu jistgħu jaċċessaw wieħed mill-aktar mekkaniżmi importanti ta’ finanzjament tal-koproduzzjoni fl-Ewropa, u b’hekk jissaħħaħ aktar l-iżvilupp, is-sostenibbiltà u l-preżenza internazzjonali tas-settur awdjoviżiv Malti.
