Malta kompliet issaħħaħ il-pożizzjoni tagħha bħala ċentru ewlieni fil-qasam tal-governanza tal-oċeani wara li l-Ministru għall-Affarijiet Barranin u Ewropej Chris Fearne ffirma ftehim ġdid mal-International Ocean Institute (IOI), li permezz tiegħu l-istitut se jkompli jżomm il-kwartieri ġenerali tiegħu f’Malta.
Dan il-ftehim iġedded u jimmodernizza l-qafas ta’ kollaborazzjoni bejn Malta u l-IOI, filwaqt li joffri bażi aktar moderna għall-ħidma tal-Istitut minn pajjiżna. Fl-istess ħin, isaħħaħ ir-rwol ta’ Malta bħala ċentru internazzjonali fil-governanza tal-oċeani, il-liġi marittima, l-edukazzjoni u l-promozzjoni tal-użu sostenibbli tar-riżorsi tal-baħar.
Qabel l-iffirmar tal-ftehim, il-Ministru Fearne ltaqa’ mad-Direttur Maniġerjali tal-IOI, Antonella Vassallo, u mal-Professur Simone Borg, fejn iddiskutew il-ħidma tal-Istitut kemm f’Malta kif ukoll barra minn xtutna. Fost is-suġġetti ewlenin kien hemm il-programmi ta’ taħriġ u edukazzjoni fil-qasam tal-governanza tal-oċeani. Għall-iffirmar kien preżenti wkoll is-Segretarju Permanenti tal-Ministeru, Christopher Cutajar.
Il-Ministru Fearne enfasizza li l-baħar jibqa’ element essenzjali għall-identità u l-ekonomija ta’ Malta, kif ukoll għall-politika barranija tagħha. Qal li dan il-ftehim se jkompli jsaħħaħ il-kontribut ta’ Malta fuq livell internazzjonali fil-promozzjoni ta’ governanza sostenibbli tal-oċeani, filwaqt li jibni fuq l-esperjenza u l-wirt li pajjiżna għandu f’dan il-qasam.
L-International Ocean Institute twaqqaf fl-1972 mill-Professur Elisabeth Mann Borgese u ilu marbut ma’ Malta għal aktar minn ħamsin sena. L-Istitut huwa mibni fuq il-prinċipju tal-Common Heritage of Mankind, kunċett li ġie promoss mill-Ambaxxatur Malti Arvid Pardo u li kellu impatt sinifikanti fuq l-iżvilupp tal-liġi u l-governanza internazzjonali tal-oċeani.
Illum, mill-kwartieri ġenerali tiegħu f’Malta, l-IOI jikkoordina programmi internazzjonali ta’ taħriġ u edukazzjoni u jikkollabora ma’ professjonisti, uffiċjali pubbliċi u dawk li jfasslu l-politika madwar id-dinja biex ikomplu jsaħħu l-għarfien u l-kapaċitajiet tagħhom fil-governanza tal-oċeani.
