Bejn is-17 u d-19 ta’ Lulju, Tas-Sliema qed tilqa’ edizzjoni oħra tal-Is-Sliema Arts Festival, avveniment li matul is-snin stabbilixxa ruħu bħala wieħed mill-appuntamenti kulturali ewlenin fil-kalendarju Malti.
Organizzat mill-Kunsill Lokali ta’ Tas-Sliema bl-appoġġ tal-Ministeru għall-Gvern Lokali u x-Xogħlijiet Pubbliċi, il-festival joffri programm mimli attivitajiet li jinkludu arti fit-toroq, murals, wirjiet ta’ pittura, mużika, żfin, workshops kreattivi, swieq tal-artiġjanat u divertiment għall-familja kollha.
Id-dettalji tal-festival tħabbru mill-Ministru Alison Zerafa Civelli flimkien mas-Sindku ta’ Tas-Sliema John Pillow u ċ-Chairman Eżekuttiv tal-Kunsill Malti għall-Arti Luke Dalli. Huma enfasizzaw kif avvenimenti bħal dawn jgħinu biex il-kultura tkun aktar aċċessibbli filwaqt li jsaħħu l-parteċipazzjoni tal-komunità u jagħtu ħajja ġdida lill-ispazji pubbliċi.
Il-Ministru Zerafa Civelli sostniet li l-kunsilli lokali għandhom rwol importanti fit-tisħiħ tal-komunitajiet tagħhom u fil-ħolqien ta’ inizjattivi li jġibu lin-nies flimkien. Hija rrimarkat ukoll li l-appoġġ tal-Gvern għal dawn l-attivitajiet juri impenn lejn komunitajiet aktar attivi, kreattivi u sostenibbli.
Min-naħa tiegħu, is-Sindku John Pillow qal li l-festival sar punt ta’ referenza kulturali għal Tas-Sliema, hekk kif kull sena jiġbor flimkien artisti, residenti, negozji u viżitaturi. It-tema ta’ din is-sena, “BY HUMANS. FOR HUMANS.”, tiffoka fuq l-importanza tal-kreattività u r-relazzjonijiet umani f’era dejjem aktar influwenzata mit-teknoloġija.
Luke Dalli spjega li l-Kunsill Malti għall-Arti huwa kburi li jappoġġja inizjattiva li tagħmel l-arti parti mill-esperjenza ta’ kuljum u li turi kif l-ispazji pubbliċi jistgħu jinbidlu f’ċentri ta’ kreattività u espressjoni kulturali.
L-edizzjoni ta’ din is-sena qed tkun immexxija mill-kunċett artistiku “Error 404: Human Not Found”, maħluq mid-Direttur Artistiku Rachel Formosa, li jesplora l-interazzjoni bejn il-bniedem u t-teknoloġija permezz ta’ arti kontemporanja, kultura urbana, mużika elettronika u installazzjonijiet kreattivi fil-qalba tal-lokalità.
Matul it-tlett ijiem tal-festival, huwa mistenni li aktar minn 20,000 persuna jżuru Tas-Sliema, li se tinbidel f’ċentru vibranti ta’ arti, kultura u kreattività għal residenti u turisti.
