Iċ-Ċelebrazzjonijiet Nazzjonali ta’ Lejlet l-Ewwel tas-Sena se jerġgħu jsiru fil-Belt Valletta, b’lejl mimli mużika live, divertiment u wirja spettakolari tan-nar fuq il-Port il-Kbir. Pjazza San Ġorġ se tkun fiċ-ċentru tal-festivitajiet u se tilqa’ diversi artisti Maltin kif ukoll internazzjonali.
Il-Ministru għall-Kultura, l-Artijiet u l-Gvern Lokali, Owen Bonnici, qal li din iċ-ċelebrazzjoni saret punt ta’ laqgħa annwali li tgħaqqad komunitajiet differenti fil-qalba tal-kapitali. Huwa żied li l-avveniment jenfasizza t-talent lokali filwaqt li jospita artisti barranin li jagħmlu l-lejla aktar speċjali, u li l-Gvern jibqa’ impenjat li jappoġġja inizjattivi li jġibu ferħ, unità u esperjenza kulturali b’saħħitha għall-pubbliku.
Il-Chairman tal-Aġenzija Kulturali għall-Belt Valletta, Jason Micallef, tenna li dan huwa bla dubju l-akbar avveniment tat-tmiem tas-sena f’Malta. Huwa stieden lil kulħadd jingħaqad fil-Belt Valletta u fil-Port il-Kbir f’nofsillejl għall-aktar wirja impressjonanti tan-nar li qatt saret, li tkun possibbli grazzi għall-kollaborazzjoni mal-Awtorità tat-Turiżmu ta’ Malta. “Ejjew nilqgħu flimkien is-sena 2026,” temm jgħid.
Il-programm jibda b’wirja mill-kantant Glen Vella u l-band tiegħu. Segwit minn kunċert speċjali mill-Palace String Orchestra, li fih se jieħdu sehem diversi artisti popolari fosthom Aidan, Drakard, Denise, Gaia, Karin Duff, Keith Zammit Mintoff u Klinsmann. Hekk kif toqrob is-siegħa tan-nofsillejl, id-DJs Denzel Jo Armani u Wayne se jieħdu r-ritmu tal-palk b’sett enerġetiku, akkumpanjat minn effetti viżivi u logħob tan-nar li se jixxandar ukoll dirett fuq it-televiżjoni lokali.
Mal-mument tan-nofsillejl, l-artist internazzjonali John Newman se jagħti performance live biex jilqa’ s-sena l-ġdida, magħruf għas-suċċessi tiegħu bħal Love Me Again u l-kollaborazzjoni ma’ Calvin Harris fuq Blame. Il-lejla se tagħlaq b’sett mid-DJ Gabii.
Din iċ-ċelebrazzjoni nazzjonali hija organizzata minn G7 Events u ssir bl-appoġġ tal-Ftehim ta’ Sħubija għal Avvenimenti fuq Skala Kbira tal-Aġenzija Kulturali għall-Belt Valletta, fi ħdan il-Ministeru għall-Kultura, l-Artijiet u l-Gvern Lokali. L-avveniment huwa appoġġjat ukoll mill-Awtorità tat-Turiżmu ta’ Malta u se jkun ippreżentat minn Jamie Cardona u Taryn Mamo Cefai.
Ritratti: MCLG
